Leebe Gemeen,

Ik wünsch jou enen schöönen gooden Morgen an dissen 2. Mai. Hüüt schull de Buurnmarkt in Odderndörp ween. Ober wegen Corona mutt de dit Joor utfallen.

Mien Gedanken goot dree Joor trüch in dat Joor 2018. Dat weer dat erste Joor as dat hier in de Kark een plattdütsche Ansprook to den Buurnmarkt geben de. Dat weer de eerste Mai un dat hett regent as wi ut de Kark gungen. Door koom ik noher noch mool op to snacken.

Mien Gedanken goot noch wieder trüch no den Anfang von dat Joor 2018. Jedet Joor giff dat een Jooreslosung an den Anfang von’t Joor. Dat is jümmer een Vers ut de Bibel. De wardt von kloke Lüüd von de Kark utsocht. Un de gelt för dat ganse Joor un för alle Karkengemenden. För 2018 weer de Johreslosung: Ik will de Döstigen geben von de Kwell von mien Woter för ümsünst. Öber dat Thema worr in den Januar 2018 ook de eerste Goddesdeenst hier bi uns in de Kark holen. Ik heff no den Goddesdeenst bi mi dach: hier bi uns hebbt wie jo jümmer noog Woter. Meist hebbt wi ok veel to veel dorvon. Ut de Woterleitung kummt jo jümmer wat un ok för dat Land hebbt wi lich genoog. Un an denn Dag von den Gottesdeenst to den Buuernmarkt hett dat jo ook den ganzen Dag regent. Bloots denn no den eeersten Mai keem een teemlik dröge Tied hier bi uns un ok in veele Ecken von Dütschland. De Minschen freuen sik dorto. Jüss de Tied in de se in’n Urlaub fören wullen weer jeden Dag schön Wedder. Man bruuk nich veel Tüüch antotrecken un de Stimmung weer dör dat Wedder veel beter. Un sogor dat Woter in den Bodensee un in de Elv weer veel warmer as in annere Jooren. Von Anfang Mai bit ungefeer den teinten August is so goot as goorkeen Regen bi uns komen. In veele annere Ecken von Dütschland weer dat jüst so. All weeren froo, dat wi endlik so een schönen Sommer mit so veel Sünnenschien harren. Dat Thermometer gung jeden Dag een beten höger un opletz feel dor nich veel an de veertig Grod.

Dat geev ober ook noch een anner Siet von dat schöne Wedder. Dat Wassen bi de Planten gung veel sinniger as in anner Jooren. Seker hebbt sik ok dorto veele Lüü freut. Se bruken denn jo veel weniger den Rosen to meien. Is doch aalen fein oder? Jo op den Karkhoff de Grafstee, door müssen de Blomen un Planten gooten warren. Dat weer bi de Hitt seker teemlik anstrengend un man müss door ok jümmer an denken un dröff dat nich vergeten. Ober door kunn jo ok nich meer bi passeeren as dat de Blomen ingungen. Na den müss door frisch plant warren. Ik heff tomools foken an de Jooreslosung dach. Wi hebbt jümmer Woter noog heff ik in’n Anfang von dat Joor noch seegt. Dat dat so dröög warren de dor harr ik jo niemols mit rekt. Nu weer dat so wied.

Un ik heff ok seen wo de Planten eers weniger wussen un von Midde Juli an so goot as gor nich meer wussen. Un wenn dat allens nich meer so recht wasst, wat hett dat Vee op de Weiden ook weniger to freeten. Ok dor wuss so goot as keen Gras meer. Dat geef Buurns, de een poor Tieren verköpen müssen dat dat anner Vee noog to freeten harr. Un dat hett Ecken in Dütschland geben wo dat noch veel slimmer weer mit de Dröögte. Op dat Geestland door feel dat Woter noch veel meer as hier bi uns. Fachlü hebbt denn ok all fröö utrekt wo veel dat Joor vörutsichtlik weniger oornt warren schull. Un welke Lüü hebbt ok utrekt wo lang uns Drinkwotervörrot noch recken de. De Vörrot weer al veel weniger worren as in de Jooren vörher. Un de Woterverbruuk weer veel höger as in annere Jooren. Jo disse Dröögt in 2018 also harr ook Nodeele.

Veele Lü marken dat nich, ober se lesen doch in de Zeitung oder höören in’n Fernsehen von dat Problem un veele keemen denn toon Noodenken doröber. Wo kann de leebe Gott so wat bloot toloten? Un womit hebbt wi dat verdeent? So hebbt sik veele Lü froogt. Un op de Frogen hett nümms een Antwoot kreegen. Ik kann disse Frogen von de Lü goot verstohn. Mi is dat foken jüst so goon.

Un denn giff ok Klimaforschers bi uns. Dat sünd Lü de sik Gedanken mokt woher dat kummt, dat uns Eer in de letzten 100 Jooren veel warmer worren is. Un de meent, dat wi Minschen dor toon groten Deel sülbst an Schuld sünd. Un de meent ok, dat so een dröög Joor as 2018 von den  Klimawannel kummt. Ober de segt ok, dat döör den Klimawannel een Joor mit ganz veel Regen komen kann. Ik glöv dat, wat disse Lü erforscht hebbt. Un ik fin dat ok goot, dat se dat mookt. Schöön weer, wenn wi uns dat aal to Harten nemen un dat in Tokunft beter moken un wat Godes doon för unse Eer. Wi schullen nich seggen, dat hett sowiso allens keen Zweck meer. Seker kann de Enkelte door wenig utrichten, ober wenn dat jeder mookt kann doch een ganzen Barg passeeren un sik veel verbetern op unse schöne Welt. Ik denk, dat dat Weller nich von uns Minschen mokt warren kann. Dat kummt von den leeben Godd. He mokt dat so as he dat hebben will. Dat geit nich no uns.

Nu noch mol wedder trüch no dat Joor 2018. Jo in den August keem enlik Regen. Wo schön för uns al. Dat weer de eersten Dog blot een lütt beten, ober dat worr noher meer. Dat Koorn weer al vör den Regen oornt. De Oorn is hier bi uns doch noch so eenigermoten utfullen. Se weer beter utfullen as de Lü, de dat al för lange Tied berekt harren, seggt hebbt. Dat geev ober annere Ecken in Dütschland wo veel weniger ornt worren is as berekent weer. Dat hett veele Buurn in Dütschland geben, de ganz wenig ornt hebbt. Dat dröft wi nich vergeeten.

Ik heff denn no den ersten Regen den Kool, den mien Söön plant hett, bekeken. De weer natürlik noch nich oornt. Lange Tied ok noch no den ersten Regen heff ik dach, dor wardt dit Joor öberhaupt nix von. Ok Ende September see dat noch so ut: Veele Planten harren noch gor keen Kopp. Ober in den Oktober keemen dor doch noch Köpp un de Planten sünd goot wieterwussen. An Innen weer dat woll keen Rekordoorn, ober doch veel meer as ik noch in September dach hebbt. Un natürlik ok veel meer as de Lü seggt hebbt, de ganz fröö rekt hebbt. De Natur kann würklik in een körte Tied een ganzen Barg öberholen, wat wi gor nich ohnen, glöben oder bereken könt.

Wat könt wi nu von dat Ganze mitnehmen? De leebe Gott mokt dat Wedder un alle annern Sooken so as he dat will. He mokt dat nich so as wi Minschen dat geern harren. So as wi meenen, dat dat goot för uns weer. De leebe Godd kann ok Soken möglik moken, de wi för unmöglik hoolt, so as ik dat Wassen von den Kool in den Oktober belevt heff. Un wi könt sowat ok vörher nich bereken, ok wenn wi noch so klook sünd. Un de Möglikkeiten von den leeben Godd gift dat is nich blot bi dat Weller. Ok in uns Leben kann de leebe Godd Soken moken, de wi nich för möglik hoolt. Ik harr in mien Leben vör veele Jooren een Tied to dach ik, wo schall dat blot wietergoon? Worüm mutt mi dat so slech goon? Wo kann de leebe Godd dat toloten?

Ober wenn ik hüüt, veele Jooren loter, trüch kiek, denk ik: so slimm weer dat doch gornich. Un ik denk sogor, wenn dat tomools nich passeert weer, weer mien Leben anners verlopen un ik harr veele schöne Soken in mien Leben nich so schön beleft. Dat is natürlik nich jümmer so.

Villich geit den eenen oder annern dat jo jüst so. Denn schullen wi unsern leeben Godd dorför jümmer von Harten dankbor ween. Un dat dröft wi nich vergeten. Amen

Un Godd sien Freden, de höger is as allens wat wi weet, könt un mokt, de bewoor uns mit Hart, Lief  un Seel dör unsen Herrn Jesus Christus op ewig. Amen

 Albert-Wilhelm Oest (am 2.5.21 in der Otterndorfer Kirche vorgetragen)